Анотация: | Теманын актуалдуулугу буга чейин кыргыз тил илиминде реклама массалык коммуникацияны камсыз кылган текст катары спецификасынын иликтенбегени, рекламалык тексттердин тилдик уюшулушу, колдонулган тилдик каражаттар жана ыкмалар иликтөөгө алынбаганы менен байланыштуу. Коомдук турмушубуздун бардык чөйрөлөрүндөгү өзгөрүүлөр, жаңылыктар, жетишкендиктер менен тез жана жеткиликтүү көлөмдө тааныштырган күчтүү маалымат агымынын чоң үлүшү рекламаларга таандык. Реклама – бир нерсе тууралуу маалымат берүү, жайылтуу, таркатуу максатына ээ болгон түрдүү иш-чаралардын татаал системасы. Анын негизги милдеттери – адамдардын муктаждыктарын пайда кылып, суроо-талаптарын калыптандыруу, товарлар, кызмат көрсөтүүлөр, идеяларды ж.б. пайдалануу тууралуу маалымат берүү, товар, кызмат көрсөтүү, идеялардын ж.б. ичинен ылайыктуусун тандап алууга түрткү берүү, адамдардын табит-татымын калыптандыруу. Реклама биздин турмушубузда экономикалык, социалдык, психологиялык, саясий, идеологиялык, билим берүүчүлүк, эстетикалык ж.б. багыттагы кызматтарды аткарат. Көп түрлөрдөн, жанрлардан жана формалардан турган, аткарган милдеттери жана колдонулган каражаттардын көп түрдүүлүгүнө ээ болгон татаал система болуп саналгандыктан, реклама түрдүү илимдердин көз карашынан изилдеп-үйрөнүүгө алынышы мыйзам ченемдүү: журналистика, лингвистика, семиотика, социология, психология, экономика, эстетика ж.б. |
