Анотация: | Диссертациянын сунушталган темасында түрү да, масштабы да ар башка маданий феномендер – аксиология жана залкар сүрөткерибиз Чыңгыз Айтматовдун романдары жуурулушкан. Биринчиси эң башынан эле философиялык билимдер аймагына таандык болгон, аз убактан бери гана көркөм өнөргө карата конкреттүү чыгармаларды чечмелөөнүн бөтөнчө аспектиси ролунда колдонулуп келатат. Экинчиси болсо эбактан бери эле (романдар жарыялангандан тартып) адабиятчылардын, сынчылардын, дегеле жалпы окурмандардын көңүлүн буруп келет. Залкар жазуучунун романдары – «Кылым карытар бир күн», «Кыямат», «Кассандра тамгасы», «Тоолор кулаганда» – адабий коомчулукта чоң ийгиликке ээ болуп, кызуу талаш-тартыш жаратып, татыктуу баасын алышкан. Эгерде аксиологиялык кубулуштарга же Ч. Айтматовдун романдарына өз-өзүнчө адабий мамиле кылсак – ал салыштырмалуу түрдө актуалдуу болушу ыктымал. Бул эки кубулушту эриш-аркак жуурулуштурсак – изилдөөнүн жаңычылдыгы менен актуалдуулугу шексиз болот. Жогорку чыгармаларды так мына ушул аспектиде алиге чейин эч ким тутумдуу жана комплекстүү изилдөөгө ала элек. |
