Анотация: | Стилистика менен риториканын өзөгүн троп жана фигура түшүнүктөрү түзөт. Бул кепти көрктөө, кооздоо каражаттары байыркы антикалык доордо эле ар тараптан каралып, талданып чыккан болчу. Ушул багытта аткарылган көптөгөн ораторлордун, философтордун, стилисттердин эмгектери белгилүү (Феофраст, Аристотель, Деметрий, Цицерон, Квинтилиан ж.б). Бүгүнкү күндө троп менен фигуралардын жалпы саны беш жүздөн ашат. Троп менен фигура даана жиктелет. Биздин эмгектин темасы чектүү: ал позициялуу жана позициясыз кайталоолорду гана бөлүп алып, стилистикалык фигура катары кыргыз тилинин материалында сыпаттоого арналат. Учурда кайталоонун сөздү көркөмдөөчү мүмкүнчүлүктөрүн ар тараптан иликтөө зарылдыгы бар. Кайталоо – кепте өтө жыш таркалган фигура. Анын кичи түрлөрү да көп, ошондуктан ички түрлөнүшү жана жиктелиши да татаал, бир кылка эмес, гетерогендүү мүнөздө. Кайталоону бир эле принциптин же критерийдин негизинде аныктоого болбойт. Анын мазмунун ачыш үчүн ар түрдүү принциптер, ыкма-методдор, ар кыл терминдер колдонулат. |
